Urang Sunda Kudu Nyunda

Kuring gubrag ka dunya disanggap ku ema paraji

Dipapag ku indung jeung  bapa..

Halimpuna sora bapa ngaharewos ngalangkungan adan

Kanyaahna indung teu eureun ngayun ngambing bari ngahariring..

Bapa leukeun ngawurukan kuring ngaji jeung solat

Supaya kuring salamet dunya akherat

Indung ngajarkeun kuring kana kahirupan

Sangkan bisa nempatkeun maneh dina mangsa kahareup

Dina hiji poe, indung jeung bapa teh mere piwuruk

Ieuh Neng, putra harepan ema jeung bapa

Anjeun teh cing jadi jalma bener tur singer

Hirup di tatar sunda kudu bisa nyunda

Keun bangsa deungeun maju ku tehnologina

cik atuh urang mah ronjatkeun heula weh budayana

Kudu resep ieuh kana budaya sunda teh

Sabab ngan eta titinggal ti nini aki

tuturan para karuhun, tapak lacak nu baheula..

Tah, Ema.. Bapa.. ayeuna kuring geus bisa lumpat

Keur neangan elmu panemu anu bisa manfaat

Urang leukeunan mapay jalan satapak anu loba pisan pengkolan

Sangkan kuring boga pangalaman

Mun seug kuring caliweura

tong hilap lelempeng deui

Kuring tetep hayang jadi urang sunda anu nyunda

                                           31 Maret 2012